CSK vs SRH: வாழ்வா சாவா நிலையில் சென்னை அணி!

ஐபிஎல் 13ஆவது சீசன் 29ஆவது லீக் போட்டியில் சென்னை சூப்பர் கிங்ஸ், சன் ரைசர்ஸ் ஹைதராபாத் அணிகள் இன்று மோதுகின்றன.பிளே ஆஃப் சுற்றுக்குத் தகுதிபெற 8 போட்டிகளில் வெற்றிபெற்றாக வேண்டும் வேண்டிய நிலையில், சென்னை அணி முதல் 7 போட்டிகளில் இரண்டில் மட்டுமே வெற்றிபெற்றுள்ளது. எஞ்சியுள்ள 7 போட்டிகளில் 6 போட்டிகளில் வெற்றிபெற வேண்டிய கட்டாயத்தில் இருப்பதால், இன்று நடைபெற உள்ள போட்டியில் சென்னை அணி சிறப்பான ஆட்டத்தை வெளிப்பத்தி வெற்றி பெறும் என்று எதிர்பார்க்கப்படுகிறது.

ஹைதராபாத் அணி கடைசியாக ராஜஸ்தான் ராயல்ஸ் அணிக்கு எதிராக விளையாடியபோது, 5 விக்கெட் வித்தியாசத்தில் தோல்வியைச் சந்தித்தது. அதேபோல, சென்னை அணி கடந்த இரண்டு போட்டிகளில் மோசமான தோல்வியை பதிவு செய்தது. இதனால், இன்றைய போட்டியில் வெற்றிபெற இரு அணிகளும் கடுமையாகப் போராட வேண்டிய நெருக்கடியில் உள்ளன.

சென்னை அணியில் நடுவரிசை பேட்ஸ்மேன்கள் தொடர்ந்து சொதப்பி வருவது அணிக்குப் பாதகமாகப் பார்க்கப்படுகிறது. இனி வரும் போட்டிகளில் நிச்சயம் வெற்றிபெற்றாக வேண்டிய சூழ்நிலை நிலவுவதால், மகேந்திரசிங் தோனி, ரவீந்திர ஜடேஜா, சாம் கரன் போன்றவர்கள் சிறப்பாக விளையாட வேண்டிய கட்டாயத்தில் இருக்கிறார்கள். இதனால், இன்றைய ஆட்டத்தில் நடுவரிசை பேட்ஸ்மேன்கள் மீது கூடுதல் எதிர்பார்ப்பு ஏற்பட்டுள்ளது.